Category: Imeachtaí Sóisialta/cultúrtha

Oíche Chártaí - Déardaoin, 21 Meán Fómhair - Pipers Corner

18/9/2023

Beidh Oíche Chártaí againn an Déardaoin beag seo sa Teach Tábhairne Pipers Corner.

Cluiche Cártaí 25 a imrímid agus arís - Pipers Corner, 7:00pm, Déardaoin, 21 Meán Fómhair 2023.

Bíonn seisiún cártaí againn an chéad Déardaoin agus an tríú Déardaoin gach mí.

Oícheanta sóisialta a bhíonn iontu - ní bhíonn airgead ná gealltóireacht i gceist!
Mura bhfuil an cluiche ar eolas agat, ná bí buartha - beidh pacaí cártaí agus na rialacha againn, agus cúpla duine ann chun iad a mhíniú.

Bí ann agus bain taitneamh as an gcomhluadar.

Oíche Chártaí - Déardaoin, 7 Meán Fómhair - Pipers Corner

3/9/2023

Bhí cúpla oíche chártaí againn sa Teach Tábhairne Pipers Corner roimh an Samhradh.
Anois, agus na siúlóidí Samhraidh críochnaithe, táimid chun leanúint ar aghaidh leis na cártaí chun oícheanta dorcha an Gheimhridh a líonadh.

Beidh seisiún cártaí againn ag 7:00pm an chéad Déardaoin agus an tríú Déardaoin gach mí sa Pipers Corner ar Shráid Mhaoilbhríde.

An Cluiche Cártaí 25 a bheidh á imirt agus beidh an chéad oíche ar siúl an Déardaoin 7 Meán Fómhair 2023 ag 7:00pm

Mura bhfuil an cluiche ar eolas agat, ná bí buartha - beidh cúpla paca cártaí agus na rialacha againn, agus cúpla duine ann chun iad a mhíniú.
Oícheanta sóisialta a bheidh iontu - ní bheidh airgead ná gealltóireacht i gceist!
Bí ann agus bain taitneamh as an gcomhluadar.

Fiche Bliain ag Fás - MV Cill Áirne, 2 Meán Fómhair 2023

29/8/2023

Cúis cheiliúrtha - Fiche Bliain ag Fás.
Tá ár gclub, Na Cnocadóirí, 20 bliain d'aois.

Fiche bliain ó shin, Dé Domhnaigh, 14 Meán Fómhair 2003, bhí ár gcéad siúlóid againn, sa Láithreach i gCill Mhantáin.
Chun é sin a cheiliúradh beidh ócáid againn Dé Sathairn, 2 Meán Fómhair 2023.

Beimid ag bualadh le chéile le haghaidh béile ag 7:30 i.n. sa bhialann ar an mbád Cill Áirne, atá ar ancaire ag 16 Cé an Phoirt Thuaidh.
Beidh fáilte romhat bheith linn.
Tar éis an dinnéar beimid in ann fanacht ar an mbád chun deoch nó dhó a fháil.

Costas: €47.00 (tá an táille seirbhíse san áireamh).
Is gá íoc roimh ré agus bheimis an-bhuíoch díot as an €47.00 a íoc roimh thús mhí Lúnasa.
Is é an bealach is éasca chun íoc as an dinnéar ná íocaíocht leictreonach a dhéanamh díreach isteach i gcuntas an Chlub. Mura bhfuil sonraí an chuntais agat is féidir iad a fháil trí ríomhphost a chur chuig cnocadoiri@yahoo.com.
NÁ DÉAN DEARMAD D’AINM A CHUR LEIS AN ÍOCAÍOCHT.
Ansin cuir ríomhphost chuig cnocadoiri@yahoo.com chun a chur in iúl go bhfuil an íocaíocht déanta agat.

Sa chás go mbeidh deacrachtaí agat íocaíocht a dhéanamh ar líne, téigh i dteagmháil linn agus déanfaimid socrú eile.

Cluiche Cártaí - 5 Aibreán - Pipers Corner

2/3/2023

Cluiche Cártaí 25
Sin é an cluiche a d'imrítí oícheanta airneáin sna seanlaethanta - agus imrítear go fóill é nuair a thagann comharsana le chéile.
Sin an cluiche a bhíothas á imirt sa chistin sa scannán An Cailín Ciúin.

An bhfuil an cluiche cártaí 25 ar eolas agat?
An bhfuil suim agat an cluiche a chleachtadh?
Nó an bhfuil suim agat an cluiche a fhoghlaim? - Seo do sheans.

Táimid chun oíche chártaí a eagrú sa Teach Tábhairne "Pipers Corner" ar Shráid Mhaoilbhríde, Dé Céadaoin, 5 Aibreán, ag 6:00 i.n.

Ní gá an cluiche 25 a bheith ar eolas agat, beidh pacaí cártaí agus na rialacha againn chun é a mhúineadh.

Oícheanta sóisialta a bheidh iontu - ní bheidh airgead ná gealltóireacht i gceist!

Siúlóid Éasca - Dé Domhnaigh, 19 Feabhra 2023 - Dugthailte BhÁC

4/2/2023

Seo siúlóid threoraithe ina mbeidh cur síos ar Ailtireacht, ar Ealaín Phoiblí agus ar Innealtóireacht na nDugthailte, an Bhalla Thuaidh agus an Phoirt Thoir.

Teacht le chéile: 11:00 i.n. Lasmuigh de Teach La Touche, an IFSC (In aice Sráid Amiens, díreach os comhair Busárus).
Mairfidh an tsiúlóid timpeall uair go leith, agus beidh deis ann cur leis agus dul níos faide i dtreo na Rinne, agus Duga na Canála Móire.

I ndiaidh na siúlóide is féidir linn deoch no greim bia a fháil sa teach tábhairne “The Ferryman” ar Ché John Rogerson.

Treoraí: Breandán

Scannán - An Cailín Ciúin - Dé Céadaoin, 1 Feabhra 2023 - Ráth Maonais

29/1/2023

Tá scata beag againn ó Na Cnocadóirí chun an scannán An Cailín Ciúin a fheiceáil san Omniplex sa Swan Centre i Rath Maonais, Dé Céadaoin, 1 Feabhra 2023 ag 8:20i.n.

Beidh fáilte romhat má bhíonn suim agat teacht linn, ach bí cinnte go bhfaighidh tú do thicéad roimh ré ar líne anseo - https://www.omniplex.ie/booking/dublin-rathmines/seats/66993
(Ach bí cúramach - Is cosúil nach nglacann an suíomh sin le síneadh fada i do chuid sonraí)
Buailfimid le chéile ag 20.00 i bhforhalla na Pictiúrlainne

Ina dhiaidh tá gach seans go mbeidh deoch againn i dteach tábhairne sa cheantar (b’fhéidir Martin B. Slattery’s?)

<<Previous

Forward>>